Aquí están las fotos de la "Convivencia 2012" No son todas por problemas
de espacio. Las fotos son obra de Luisa Mª Borbolla y mías. Que os
gusten y si alguien quiere alguna no tiene más que pedirla.
Debajo os dejo el pregón que leyeron Paula y Pablo.
PREGÓN CONVIVENCIA 2012:
Hoi,
como tolos xueves d’esti mes últimu, pintámoslu de verde. Si nos preguntaren a
qué asociamos esti color, munchas de las respuestas coincidirían: a dalgunas
personas recordará-yos a la natura, otras goleran frescura pelos espacios de
las sos lletras, dalguién imaxinará la fertilidá, dalguna asociarálo cola harmonía
y daquién suañará cola resistencia, pero casi seguru qu’a toas y caúna de las personas
equí presentes resonarános nas coradas la esperanza. Esta palabra que se
pronuncia igual, o mui apaecida, n’asturianu, castellanu, portugués, gallegu o
francés, por exemplu, apaez nel diccionariu con varias acepciones que tienen
connotaciones bien distintas; nunos casos l’actitú é pasiva, d’espera, a
que daquién o daqué asoceda que solucione las cosas, pero non é abondu si non-y
damos tamién un carácter activu, asumiendo la nuestra responsabilidá y obligación
de participar nel cambiu porque si non é asina, la palabra queda vacía. Esi
verde, si non lu regamos, sécase, despinta y acaba mariellu.
H.ortigueru,
Puertas, Berodia, Tielve, Arangas, Alles, Sotres, Carreña, Inguanzo,
Arenas... Bien pocu queda de lo que dalgún día foi toa una rede d'escuelinas
que nos años últimos fueron cayendo una tres d'otra. En tiempos d’estas
escuelas, el día d’hoi, la convivencia, tenía un sentíu que, agora, escápasenos.
Tuvo de ser de los primeros espacios d'alcuentru ente mocedaes que col tiempu
diban quedase al cargu del conceyu, mirando por elli con procuru y xenerando
entoncies otros espacios d'alcuentru. Queda nel aire la duda de si están mermándose
los servicios, como las escuelas rurales, porque non hai naciatos o si’l
procesu é l'inversu, non é prácticu qu'haiga reciella nos pueblos porque non
hai servicios.
Hai
equí neños qu'empecipiaron la so vida académica na escuela del so pueblu, al par
de casa. Hai tamién compañeres y compañeros que trabayaron nesas escuelas,
madres y padres que llevaron bien arguyosos a los sos neños a la escuela'l puelu.
La realidá n'Asturies hoi, la realidá d'estas escuelinas é que tienen un futuru
bien escuru.
Asina,
la convivencia hoi pierde aquella función d'axuntar los pueblos, pero eso nun
quita pa da-y conteníos nuevos, convivir, conocenos y ayudanos a ver, con
claridá meridiana, que non nos diferenciamos en gran cosa, que compartimos las mesmas
ilusiones y tamién los mesmos problemas y que cuando más nos arimemos a ser
"una", más claro vamos ver que si nos tocan a una, tócannos a toas...
Hoi,
bien de las personas presentes tamos equí camufladas ente'l verde del nuestru
monte, esi verde que-y dicíen a Montesín, aquel cabritín madrilanu; “esi verde
que güel a verde, los praos, las árgumas, las sebes. Tou verde. La cirezal, el
nozalón...” Porque queremos respetar el nuestru entornu, porque queremos
respetanos ente nós y porque desiximos respetu pa con ún de los pilares de la
nuestra sociedá, la
EDUCACIÓN, sí, educación con mayúsculas, por eso tamos hoi
conociéndonos, compartiendo ilusiones, alegrías, xuegu y trabayu pero, sobre
tou, hoi quedámonos colas ganas de disfrutar toas xuntas esti día señaláu nel
calandariu.